日夜鍛煉去取勝！四種得意Pokemon Go周邊產品介紹

「千人聚摩士捉啟暴龍」、「暴走1.4公里衝燈捕捉卡比獸」、「旺角警署外有啟暴龍 500人聚集」... 關於Pokemon Go嘅新聞近日真係多到數唔晒，相信大家對於Pokemon Go入面嘅CP，IV，升寵等方面都好熟悉，但係對於Pokemon Go嘅周邊產品，你地又知道幾多呢？

首先係Pokemon Go Plus 藍牙手帶，有玩開Pokemon Go嘅朋友都可能試過因為行路望住部手機搵小精靈，而唔小心撞到其他人。呢個手帶就可以避免發生呢種意外，當偵測到附近有小精靈出現嗰陣，手帶會震動同發光提示玩家，咁就唔洗驚因為掛住望手機而發生意外啦。

第二種周邊產品就係Pokedrone，有時係手機見到啲PokeStop明明係前面，但係又冇路行，呢個時候Pokedrone就可以幫你去果啲地方。運作原理係將無人機上的嘅GPS 訊號，傳送去手機嘅GPS接收器，以無人機代替人黎玩Pokemon Go。

下一樣產品就係Pokedex手機殼，身為一個寵物小精靈訓練員，擁有一部Pokedex應該係夢寐以求嘅事。雖然呢個只係一個冇特別功能手機殼，但係攞上手就好似真係拎住個Pokedex，可以比大家感受下做小智嘅感覺。不過暫時只係有推出Samsung Galaxy S4嘅Pokedex手機殼，其他類型嘅手機就要等下先。

最後就係Pokeball便攜式充電器。Pokemon Go食電量驚人好多人都知，出街捉小精靈帶「尿袋」是常識吧，何況身為一個小精靈訓練員，拎番個精靈球旁身係好正常嘅事，幫到你可以捉更多小精靈之餘，仲好有型添（純屬個人意見）。記住個精靈球係俾你叉電架咋，唔好攞黎掉人。