電競滑鼠知多啲

相信大家都知道滑鼠對於打機有幾重要,但係你又知唔知而家嘅電競滑鼠其實係有光學滑鼠同鐳射滑鼠之分呢? 

光學滑鼠

如果你嘅滑鼠底部係會發出紅色光嘅話,咁呢隻就係光學滑鼠。光學滑鼠嘅原理,就係通過滑鼠入面嘅LED發出可見光,再利用滑鼠移動之後產生嘅陰影變化,計算出隻滑鼠嘅方向、距離、速度。但係佢嘅缺點亦都係因為佢嘅LED,呢種滑鼠如果放左上去一啲光滑嘅表面上面用,即係好似金屬、大理石、玻璃嘅表面,個感測準確度就會差好多,所以要連埋滑鼠墊一齊用。

Microsoft Comfort Mouse 4500
圖片來源:Microsoft

 

鐳射滑鼠

如果你嘅滑鼠底部係冇發出任何光嘅話,咁呢隻就係鐳射滑鼠。鐳射滑鼠嘅原理,就係用LD (Laser Diode)直接反射表面細節,比起光學滑鼠要計算陰影變化會有更好嘅追蹤能力,亦都因為咁,即使佢放左上光滑嘅表面用,都仲可以有好好嘅感應力。比起光學滑鼠,因為唔一定要配備滑鼠墊使用,所以如果要拎出街用嘅就會比較方便。

Logitech V470 Laser Mouse
圖片來源:Logitech
光學及電射滑鼠折射嘅分別
圖片來源:哈燒王

電競滑鼠

最後想講吓啲電競滑鼠,佢有啲會係用光學感應,亦有啲係用鐳射感應。不過佢最大嘅特點,就係多數會有側鍵 (Hotkey),少則1粒,多則可能有12粒。Hotkey對於電競選手嘅效率同反應有頗大嘅幫助。除左Hotkey,可調DPI每英吋點數(Dots Per Inch)」,亦都係電競滑鼠嘅賣點之一。DPI值越高,代表滑鼠游標係螢幕上面移動嘅速度就會越快。DPI值嘅調整要視乎每個人嘅個人喜好,拎CSGO為例,低DPI可以令玩家更容易瞄準敵人嘅頭部,高DPI就可以令玩家更容易投入亂槍掃射嘅情景。

Razer Naga Epic Chroma
圖片來源:Razer

另外電競滑鼠有唔同嘅形狀,適合唔同滑鼠握法嘅人。一般有三種握法:掌握式 (Palm Grip)、爪握式 (Claw Grip)同點握式 (Fingertip Grip),咁唔同嘅握法有咩分別同適合用啲咩形狀嘅滑鼠呢?

握法特點 適合滑鼠形狀
 掌握式 大部分手掌同手心都同滑鼠有接觸,穩定性較高但係準確度較低 身長,體積大,背拱高 
爪握式 隻手好似隻爪咁捉著隻滑鼠,手指尖同手心同滑鼠有接觸,按鍵較快,控制比較準確 身短,背拱高
點握式 得手指尖同隻滑鼠有接觸,手腕放喺滑鼠墊上,比爪握式較自然,控制性亦都較高 身短,輕,背拱低
三種握法嘅示範 (原圖來自Razer)

以上嘅建議只供參考,一切都要依返自己習慣而定。所以喺買一隻新嘅滑鼠之前,記得自己試清楚,揾返隻適合自己形狀、大細、重量嘅滑鼠,同埋都要諗埋你平時點用,打咩類型嘅遊戲、會唔會成日要帶出街,需要幾多粒Hotkey呢啲因素都要好好考慮。希望大家都可以搵到一隻自己啱心水嘅滑鼠啦!

RELATED ARTICLES

Leave a comment

Your email address will not be published. Required fields are marked *